கருப்புப் பண ஒழிப்பு
இம்மாதம் எட்டாம் தேதி இரவு ஒன்பது மணிக்கு திடீரென்று 12 மணி முதல் 500ரூபாய், 1000ரூபாய் நோட்டுகள் செல்லாது என்ற அறிவிப்பைப் பிரதமர் வெளியிட்டார். உடனே வாட்ஸப்பிலும் முகநூலிலும் அதை வரவேற்றுப் பல அறிவிப்புகளையும் பார்த்தேன். ஆனால் அடுத்த நாளே அதன் யோக்கியதை என்ன என்பது வெட்டவெளிச்சமாகிவிட்டது.
இந்த அறிவிப்பு சாதாரண மக்களை நடுத்தெருவிற்குக் கொண்டுவந்துவிட்டது. இதோ, இன்று முதல் ஏடிஎம்கள் செயல்படும் என்று சொன்னாலும் 10 மணி வரை எந்த ஏடிஎம்மும் சென்னையிலும் புதுவையிலும் திறக்கப்படவில்லை என்றே செய்தி. நமது அதிகாரிகள் வர்க்கம் எவ்வளவு வேகமாகச் செயல்படும் என்று மோடிக்குத் தெரியாதா? கோயம்பேடு மார்க்கெட் போன்றவைகளே ஸ்தம்பித்தன. மூன்று நாட்களாகக் கையில் காசின்றிப் பரிதவித்துச் சாப்பாடு இல்லாமல் அவதிப்பட்டவர்களையும், கடைகளை மூடிவிட்டுப்போன சிறு கடைக்காரர்களையும் இன்னும் இதுபோன்றவர்களின் அவதிகளையும் எங்கே சொல்ல? இவர்களா கருப்புப் பணத்தைப் பதுக்கி வைத்தவர்கள்?
அம்பானி, அதானி வகையறாக்களை விட்டுவிடுங்கள், குறைந்தபட்சம் நத்தம் விஸ்வநாதன் வகையறாக்களின் கருப்புப்பணத்தைப் பறிக்க மோடியால் முடியுமா? பெரும்பணக்காரர்களும் கருப்புப் பண முதலைகளும் கார்ப்பரேட் முதலாளிகளும் 500 ரூபாய் 1000 ரூபாய் நோட்டுகளை வைத்தா வியாபாரம் செய்கிறார்கள்? கார்ப்பரேட் முதலாளிகளிடமிருந்து வாராக்கடன் மட்டும் ஏழரை லட்சம் கோடி ரூபாய் இருக்கிறது. அதைத் திரும்பவும் பிடுங்க இந்த அரசுக்கு முடியுமா?
எல்லாப் பணமும் வங்கிக்கு வந்தால் கருப்புப் பணம் போய்விடுமாம். யாரிடம் இந்த ஏமாற்று? ஆதார் கார்டையும் பான் கார்டையும் வைத்துக் கண்காணிப்பு நடத்தவும், வங்கியில் வரும் பணத்தை அம்பானி மித்தல் போன்ற பெரிய முதலாளிகளுக்கு மானியமாகவும் கடனாகவும் வேறு வழிகளிலும் தாரைவார்க்கவும்தான் இந்த சூழ்ச்சி. இதனால் பாவம், பெண்கள் தங்கள் குடும்ப, அவசரத் தேவைகளுக்கு வைத்திருந்த பணம்தான் பலியாயிற்று. இதுதான் கருப்புப் பணமா? இதுவரை மோடி எந்த ஏழைபாழைகளைப் பற்றிச் சிந்தித்தார்? அவருடைய கவனம் எல்லாம் இராணுவம் உள்பட எப்படி வெளிநாட்டு உள்நாட்டு முதலாளிகளுக்கு விற்கலாம் என்பதுதானே?
ஆமாம், தான் ஆட்சிக்கு வந்தவுடன் கருப்புப் பணத்தை ஒழித்து நாட்டு மக்கள் எல்லாருக்கும் வங்கியில் ஒன்றரை லட்சம் ரூபாய் போடுவேன் என்று தேர்தல் வாக்குறுதி அளித்தாரே மோடி, அது என்ன ஆயிற்று? ஒரு வேளை இப்போது கருப்புப் பணமெல்லாம் கிடைத்து டிசம்பர் 31ஆம் தேதி புதுவருட போனஸாக எல்லாருக்கும் தரப்போகிறாரா?

பத்மநாப ஐயர்

நேற்று பத்மநாப ஐயர் பற்றிய நூல் வெளியீட்டு விழா சென்னை எழும்பூர் பாந்தியன் சாலையிலுள்ள இக்சா அரங்கில் சிறப்புற நிறைவேறியது. ‘நூலை ஆராதித்தல்-பத்மநாப ஐயர்-75’ என்னும் அந்நூலைத் திரு. ஏ.எஸ். பன்னீர்செல்வம் வெளியிட திரு.எல். அய்யாசாமி பெற்றுக் கொண்டார். விழாவைச் சிறப்புற ஏற்பாடு செய்திருந்த நண்பர் அம்ஷன் குமார் தொடக்கவுரை ஆற்றினார். தொடர்ந்து அம்ஷன் குமார் இயக்கி, தேசிய விருது பெற்ற ஆவணப்படமான யாழ்ப்பாணம் தெட்சிணாமூர்த்தி திரையிடப்பட்டது. யாழ்ப் பாணம் தெட்சிணாமூர்த்தி, ஒரு தவில் வித்வான். லயஞானத்தில் தலை சிறந்தவர். தமிழகத்தின் நாதசுர வேந்தர்களாகிய காருகுறிச்சி அருணாசலம், ஷேக் சின்ன மவுலானா போன்றவர்களாலும் பாராட்டப்பெற்ற வேகமும் திறனும் உடையவர். எல்லாவற்றுக்கும் மேலாக, இலங்கைக்கும் தமிழகத்துக் கும் பாலமாக அமைந்த கலைஞர். (இதன் குறுவட்டுகள் திரு. அம்ஷன் குமாரிடம் கிடைக்கும். வேண்டியவர்கள் வாங்கிக் கொள்ளலாம்.)

பத்மநாப ஐயரும் இவரைப் போலவே இலங்கைக்கும் தமிழகத்துக்கும் பாலமாக அமைந்தவர்தான். தமிழ்ச் சிறுபத்திரிகைகள் உலகத்தோடு பரிச்சயம் உள்ளவர்களுக்கு பத்மநாப ஐயரைத் தெரிந்திருக்கலாம், பிறருக்கு அவ்வளவாகத் தெரிய வாய்ப்பில்லை. அநேகமாக 1985ஆம் ஆண்டாக இருக்கலாம். அப்போது பத்மநாப ஐயர் திருச்சிக்கு வந்திருந்தார். பேராசிரியர் ஆல்பர்ட் அவரை எனக்கு அறிமுகப்படுத்தி வைத்தார். ஐயர் என் வீட்டுக்கு வந்ததும் அன்றி, ஈழத்தமிழ்ப் புத்தகங்களையும் அளித்தார். மல்லிகை இதழ்த் தொகுப்பு (ஆசிரியர் டொமினிக் ஜீவா) ஏறத்தாழ முழுவதும் எனக்குக் கிடைத்தது. வேறு சில பல்கலைக்கழக வெளியீடுகளையும் தனிப்பட்ட வெளி யீடுகளையும் கொடுத்தார்.

யாழ்ப்பாணத்தில் ஏதோ ஓர் உயர்ந்த அரசுப் பணியில் அவர் இருந்தார் என்று ஞாபகம். அவர் கொடுத்த நூல்கள் சிலவற்றில் அவருடைய முத்திரை (ரப்பர் ஸ்டாம்ப்) இருக்கும். ஆர். பத்மநாப ஐயர், 14/15, சங்கிலியன் வீதி, நல்லூர், யாழ்ப்பாணம் என்று அதில் காணப்படும். இது எனக்கு மனப்பாடம் ஆகிவிட்டது.

ஆம், இதுதான் அவருடைய வாழ்நாள் பணி. ஈழத்தின் நூல்களைத் தமிழகத்துக்கும் உலகிற்கும் அறிமுகப்படுத்துதல். அநேகமாக எங்களைப் போன்றவர்களுக்கு அவர் வாயிலாகத்தான் ஈழத்தமிழ் இலக்கியம் அறிமுகமாயிற்று. மஹாகவி, நீலாவணன், சேரன், யேசுராசா, வ.ஐ.ச. ஜெயபாலன், சு. வில்வரத்தினம் தொடங்கிப் பல ஈழத்துக் கவிஞர்களும், மு. தளையசிங்கம், மு. பொன்னம்பலம், புஷ்பராஜன், உமா வரதராஜன், ராஜேஸ்வரி பாலசுப்பிரமணியன் போன்ற எழுத்தாளர்கள் பலரும், சிவசேகரம், யமுனா ராஜேந்திரன் போன்ற விமர்சகர்களும் அறிமுகமானார்கள். அதற்குமுன்பு என்னைப் போன்றவர்களுக்குக் கைலாசபதியும் சிவத்தம்பியும் டானியலும்தான் தெரியும். வெங்கட் சாமிநாதனுக்கு பதிலளித்தது வாயிலாகவும் பலஸ்தீனத்துக் கவிதைகள் வாயிலாகவும் நுஃமானும் பரிச்சயம். சில விவாதக்களங்களால் எஸ்.பொ. அறிமுகமாகியிருந்தார். மற்ற ஈழ எழுத்தாளர்கள் உலகினை-குறிப்பாக மு. தளையசிங்கம் குழுவினரையும் பிறரையும் பத்மநாப ஐயர் எங்களுக்குத் திறந்துவிட்டார்.

அடுத்த ஆண்டு வந்தபோது அலை பத்திரிகைத் தொகுப்பையும் வேறு பல நூல்களையும் கொண்டுவந்து எனக்குக் கொடுத்தார். அதற்குப் பிறகும் அவர் நேரில் வராவிட்டாலும் சில முக்கியமான பத்திரிகைகள் எனக்கு வந்தன. நான் ஈழத்து எழுத்தாளர்கள் யாரையும் நேரில் பார்த்தது கிடையாது. ஆனால் எல்லாரும் எனக்கு நூல்கள் வாயிலாக அறிமுகம்.

இம்மாதிரி ஈழத்துநூல்களைத் தமிழ்நாட்டுக்குக் கொண்டுவந்து கொடுப்பது, இங்கிருந்து சிறுபத்திரிகைகளையும், நல்ல இலக்கிய நூல்களையும் ஈழத்துக்குக் கொண்டுசெல்வது-இதுதான் அக்காலத்தில் அவருடைய பணியாக இருந்தது. இதில் எவ்வளவு பணச்செலவு ஏற்பட்ட போதிலும் அவர் பொருட்படுத்தியதே இல்லை. இன்று உலகம் முழுவதும் ஈழத்தமிழ் இலக்கியம் பரவியிருக்கிறதென்றால் அதற்கு பத்மநாப ஐயர்தான் முழுமுதல் காரணம் என்பதில் ஐயமில்லை. தனது சொந்த விருப்பு வெறுப்புகளை அநேகமாக அவர் நூல்பரிமாற்றத்தில் காட்டியது கிடையாது.

அந்த இரண்டு ஆண்டுகளுடன் அவருடைய தொடர்பு எனக்கு அறுந்து போயிற்று. அநேகமாக அடுத்த ஆண்டு (1987) அவர் துணைவியார் காலமாகிவிட்டார் என்று நினைக்கிறேன். அதற்குப் பிறகு அவரை நான் காணவில்லை. அவர் லண்டனுக்குக் குடி பெயர்ந்து சென்றுவிட்டாதாகப் பின்னர் அறிந்தேன். ஆனாலும் எப்போதாவது ஒரு முறை, எனக்கு லண்டனிலிருந்து இலங்கை எழுத்தாளர்களின் வெளியீடுகள் அஞ்சலில் வரும். கடைசியாக இப்படி எனக்குக் கிடைத்தது கிழக்கும் மேற்கும் என்ற ஈழ எழுத்தாளர்களின் எழுத்துத் தொகுப்புநூல். அதன் பிறகு அவர் நூல்கள் அனுப்புவது முற்றிலும் நின்றுபோயிற்று. (இம்மாதிரி ஓர் இலக்கியப் பாலம், அல்ல, இலக்கியத் தூதுவர் தமிழகத்தில் ஏன் ஒருவரும் தோன்றவே இல்லை என்ற எண்ணத்தை வலுவாக இந்த விழா எனக்குள் எழுப்பியது.)

அவருடைய பணிகள் பலதரப்பட்டவை. நூல்களைப் பரப்புவது முதல் பணி என்றால், பத்திரிகைகள் வெளியீடு, நூல்கள் வெளியீடு, ஆவணப் படங்கள் வெளியீடு போன்ற பல விஷயங்களுக்கு அவர் துணைபுரிந்திருக்கிறார். காலச்சுவடு பத்திரிகையின் ஆசிரியர் குழுவிலும் இடம்பெற்றிருந்தார். புராஜக்ட் மதுரை என்ற திட்டத்தின் வாயிலாகச் சங்க இலக்கியம் முதல் பழந்தமிழ் நூல்களையும் சில நவீன இலக்கிய நூல்களையும் யார் வேண்டுமானாலும் பதிவிறக்கம் செய்யும்படியாக இலவசமாக வெளியிட்டிருக்கிறார். நூலகம் என்ற திட்டத்தின் வாயிலாக இதேபோல ஈழத்தமிழ் நூல்களையும் ஆன்லைன் மூலமாக அறிமுகப்படுத்தியிருக்கிறார். நூல்களை ஆராதிப்பவர்களுக்கு இந்த இரண்டு இணைய தளங்களும் நிச்சயமாகப் பரிச்சயமாகியிருக்கும். தமிழ்ப் பதிப்புத் துறையிலும் தடம் பதித்திருக்கிறார். ஆகவே அவருக்குப் பரிச்சயமாக முக்கியமான தமிழ் எழுத்தாளர்கள் யாரும் இல்லை என்றே சொல்லலாம்.

அவருடைய எளிமையும் தன்னடக்கமும் சுயவிளம்பரமற்ற தன்மையும் எனக்கு மிகவும் பிடிக்கும். தான் ஒரு மேல்சாதிக்காரன் என்ற நோக்கும் இறுமாப்பும் அவரிடம் அறவே கிடையாது. எல்லாரிடமும் மிக இசைந்து பழகக்கூடியவர். தமிழ்ப்புத்தகம், குறிப்பாக இலக்கியம் என்றால் உயிரையும் கொடுக்கத் தயங்கமாட்டார் என்பது எனது அனுபவம்.

அவருடைய பண்பையும் வாழ்நாள் பணிகள் அனைத்தையும் அறிய வேண்டுவோர் நூலை ஆராதித்தல்-பத்மநாப ஐயர் 75 என்ற இந்த நூலின் வாயிலாக அறிந்து கொள்ளலாம். அதனாலேயே நான் இந்தக் கட்டுரையைச் சுருக்கமாக முடித்துக் கொள்கிறேன். இந்த நூல் ஏறத்தாழப் பத்தாண்டுகள் ஆயத்தமாகிக் கொண்டிருந்தது. அறுபத்தைந்தாம் ஆண்டு நிறைவிலேயே வந்திருக்கவேண்டிய இது, இப்போது அவருடைய எழுபத்தைந்தாம் ஆண்டு நிறைவுக்கு வெளியாகிறது. நண்பர்கள் அனைவரும் இந்த நூலை வாங்கிப் படிக்க வேண்டும் என்று கேட்டுக் கொள்கிறேன்.

இந்த நூலில் ஏழுபகுதிகள் உள்ளன. முதல்பகுதியில் இலங்கை, இந்தியா, ஐக்கியநாடு, பிரான்ஸ், ஜெர்மனி, மலேசியா, கனடா, அமெரிக்கா, ஆஸ்திரேலியா ஆகிய நாடுகளில் வாழ்கின்ற, அவரை அறிந்த எழுத்தாளர்கள் அவரைப் பாராட்டியும் வாழ்த்தியும் கூறிய சொற்கள் அடங்கியிருக்கின்றன. (இதுவே அவருடைய பரந்த பரிச்சயத்தையும் பணியையும் காட்டப் போதுமானது.) இரண்டாம் பகுதி, பத்மநாப ஐயரின் எதிர்வினையும் நேர்காணலும். மூன்றாவது பகுதியில் சில நூல்களின் மதிப்பீடுகள் அடங்கியுள்ளன. நான்காம் பகுதியில் தமிழ்ப்பதிப்புத்துறை பற்றிச் சில கட்டுரைகள் உள்ளன. ஐந்தாம் பகுதியில் ஆவணப்பட நாயகர்களான மணக்கால் ரங்கராஜன், தவில் தெட்சிணாமூர்த்தி பற்றிய சில கட்டுரைகள் அடங்கியுள்ளன. ஆறாம் பகுதியில் ஐயரின் சாதனைகளின் பட்டியல், அவரோடு தொடர்புடைய சில பதிப்பகங்களின் வெளியீடுகள், ஈழத்து எழுத்தாளர்களின் நூல் தொகுப்புகள் பற்றிய விவரங்கள் அடங்கியுள்ளன. ஏழாவது பகுதியில் அவரைப் பலரோடும் சேர்ந்து எடுத்த ஒளிப்படங்களின் தொகுப்பு உள்ளது.

நேற்றைய விழாவில் நூல் வெளியீடு, ஆவணப்படத் திரையிடல் ஆகியவற்றுக்குப் பிறகு, வெளி ரங்கராஜன், ரவி சுப்பிரமணியன், பாரவி, அழகிய சிங்கர் நால்வரும் பத்மநாப ஐயரையும் அவரது பணியையும் பாராட்டிப் பேசினார்கள். பிறகு விழா இனிது நிறைவெய்தியது. இந்த நல் வாய்ப்பை ஏற்படுத்திக் கொடுத்த நண்பர் அம்ஷன் குமார் அவர்களுக்கு என் நன்றி மிகவும் உரியது. பத்மநாப ஐயர் இன்னும் நீண்டகாலம் வாழ்ந்து தமது நற்பணியைத் தொடர வாழ்த்துகளைத் தெரிவித்துக் கொள்கிறேன்.

 

 

 

நூலைஆராதித்தல்–பத்மநாப ஐயர் 75 — புத்தக வெளியீடு சென்னையில்.

வெளி ரங்கராஜன் , ரவி சுப்ரமணியன் , அழகிய சிங்கர் ,  ரவிக்குமார் , பாரவி ஆகியோர் நூல் மதிப்புரை வழங்குகிறார்கள் .

எல் .அய்யாசாமி , காலச்சுவடு கண்ணன் , பா .செயப்பிரகாசம் ,                     ஏ.எஸ்.பன்னீர்செல்வம் , ஆ .ரா .வெங்கடாசலபதி , க்ரியா ராமகிருஷ்ணன் , ஜி .திலகவதி , மாலன் , அரவிந்தன் , க.பூர்ணசந்திரன் , பழ .அதியமான் இரா.முருகன் , அருண் , நிழல் திருநாவுக்கரசு,  அ .சாரங்கன், சுதா ராமலிங்கம், சி .மோகன் , பி.ஆர். சுப்ரமணியன், ஜி .சுந்தர் , செல்லத்துரை சுதர்சன் .இந்திரன் , தளவாய் சுந்தரம் , சம்பத்குமார் , ,  மற்றும் பலர் சிறப்பு விருந்தினர்களாக கலந்துகொள்கிறார்கள் .

விழாவில் தேசிய விருது பெற்ற “யாழ்ப்பாணம் தெட்சணாமூர்த்தி“ ஆவணப்படம் திரையிடப்படுகிறது .

இடம் : இக்சா மையம் அரங்கு , 70 , பாந்தியன் சாலை எழும்பூர்.

நாள் : நவம்பர் 5 , சனிக்கிழமை— மாலை 5.15 மணி

தேநீர் உபசரிப்புக்குப் பின் நிகழ்ச்சி தொடங்கும்.

அனைவரும் வருக.

ஒருமுறை லண்டனின் புகழ்பெற்ற துப்பறிபவர் ஷெர்லக் ஹோம்ஸும் அவருடைய பிரசித்தமான நண்பர் வாட்சனும் வெளியூர் சென்றனர். அங்கு அவர்கள் கூடாரம் அமைத்துத் தங்கவேண்டியிருந்தது. களைத்துப் போயிருந்த அவர்கள் கூடாரத்தில் நன்றாகத் தூங்கிவிட்டனர். விடியல் ஏறத்தாழ மூன்று மணி இருக்கும். ஹோம்ஸுக்கு விழிப்பு வந்தது. வாட்சனை எழுப்பினார். “மேலே என்ன தெரிகிறது பார்?” என்றார். வாட்சனும் நன்றாகப் பார்த்தார்.

“வானம் தெரிகிறது. கோடிகோடி நட்சத்திரங்கள் தெரிகின்றன.”

“சரி, அதிலிருந்து என்ன தெரிகிறது?”

“நிறைய கேலக்ஸிகள், ஒருவேளை அவற்றில் கிரகங்கள்கூட இருக்கலாம்.”

“சரி, வேறென்ன தெரிகிறது?”

“வானியல்படி, ரிஷபத்தில் சனி இருக்கிறது.”

“அப்புறம்?”

“நட்சத்திர நிலைப்படி பார்த்தால், நேரம் மூன்றேகால் இருக்கும்.”

“அப்புறம்?”

“கடவுள் மிகவும் சக்திவாய்ந்தவர், இவ்வளவு பெரிய பிரபஞ்சத்தைப் படைத்திருக்கிறார்.”

“அப்புறம்?”

“நாளைக்கு, நாள் நல்ல வெயிலாக இருக்கும் என்று தெரிகிறது. சரி, திருப்பித் திருப்பி இவ்வளவு கேட்கிறாயே ஹோம்ஸ், உனக்கு என்ன தெரிகிறது?”

“அட முட்டாள் வாட்சன், நம் கூடாரத்தை எவனோ திருடிக்கொண்டு போய் விட்டான் என்று தெரிகிறது.”

நாம் விரும்பினாலும் விரும்பாவிட்டாலும் ஒளி-இருள் என்னும் இருமை எதிர்வு இருக்கவே செய்கிறது, நம் மனங்களில் ஆழமாகப் பதிந்தும் போயிருக்கிறது. பொதுவாக ஒளியிரவு நாட்களை-பவுர்ணமி நாட்களைக் கொண்டாடுவது தமிழர் இயல்பு. தைப்பூசம், மாசிமகம், பங்குனி உத்திரம், சித்திரைத் திருவிழா (இளவேனில் விழா)  எனத் தமிழர் திருநாட்கள் எல்லாம் பவுர்ணமி நாட்களிலேயே வருவதைக் காணலாம். அமாவாசை அல்லது இருளிரவு நாட்களை-ஆடி அமாவாசை, மஹாளய அமாவாசை, தீபாவளி எனக் கொண்டாடும் மரபு எப்போதிருந்து நுழைந்தது என்பது தெரியவில்லை.

தீபாவளி என்றால் தீபவரிசை. வடநாட்டில் தீப வரிசை வைத்துத்தான் இந்த நாளைக் கொண்டாடுகிறார்கள். ஆனால் தமிழர்களாகிய நமக்கு உண்மையான தீபாவளி, கார்த்திகைத் திருநாள்தான்! (அதுவும் பவுர்ணமி அன்றே வருவதைக் காணலாம்). சங்க இலக்கியத்திலேயே கார்த்திகைத் திருநாள் கொண்டாடப்பட்ட குறிப்பு இருக்கிறது. அன்றுதான் நாம் வீடுமுழுவதும் தீபம் ஏற்றிக் கொண்டாடுகிறோம். தீபாவளி அன்று நாம் பட்டாசுகள்தான் வெடிக்கிறோம். தீபாவளி என்றால் நினைவுக்கு வருவன மூன்று-பட்டாசு, புத்தாடை, பட்சணம்.

பழங்கதை ஒன்றின்படி, யாரோ ஒரு அரக்கன் (நரகாசுரன்) இறந்ததற்காக நாம் எல்லாரும் (திவசத்திற்குப் போல) எண்ணெய் தேய்த்துக் குளிக்கிறோம் என்கிறார்கள். ஆனால் உண்மையிலேயே தீபாவளிச் சமயத்தில் பட்டாசுகள் தயாரிப்பதற்காக ஒவ்வொரு ஆண்டும் குறைந்தது நூற்றுக்கணக்கான தொழிலாளர்கள் (இவர்கள் முறையான தொழிலாளிகள் அல்ல, முறைசாராத, எவ்விதப் பணிப் பாதுகாப்புமற்ற தொழிலாளர்கள்) இறக்கிறார்கள். அவர்களை நினைத்து எண்ணெய் வைத்து நாம் நீராடுவோம். பட்டாசுகளை வெடிக்கும் போதெல்லாம் அவற்றின் பின்னணியில் தங்கள் உயிரைக் கொடுத்த, கொடுக்கின்ற ஆயிரணக்கணக்கான மக்களை நினைத்துக் கொள்வோம். (வேறென்ன செய்வது? இந்தப் பழக்கத்தை விடுங்கள் என்று சொன்னால் கேட்கவா போகிறார்கள்? தமிழகத்திற்கு மட்டுமல்ல, இந்தியா முழுவதற்கும் போவதற்குப் பட்டாசுகள் சிவகாசியில்தான் தயாராகின்றன. சீனாவிலும் வாணவேடிக்கைகள், பட்டாசுகள் தயாரிக்கப்படுகின்றன. சீனப்பட்டாசுகளும் வெடிகளும் பழங்காலத்திலிருந்தே பெயர்போனவை. ஆனால் அங்கு இந்தத் தொழிலை முறைப்படுத்தி, பாதுகாப்புக்கான ஏற்பாடுகளைத் திறம்படச் செய்திருக்கிறார்கள்.)

If you change the sequence of letters in some English words, they give rather funny (but true) expressions. For example, See these:

DILIP VENGSARKAR
When you rearrange the letters:
SPARKLING DRIVE

PRINCESS DIANA
When you rearrange the letters:
END IS A CAR SPIN

MONICA LEWINSKY
When you rearrange the letters:
NICE SILKY WOMAN

DORMITORY:
When you rearrange the letters:
DIRTY ROOM

PRESBYTERIAN:
When you rearrange the letters:
BEST IN PRAYER

ASTRONOMER:
When you rearrange the letters:
MOON STARER

DESPERATION: When you rearrange the letters:
A ROPE ENDS IT

THE EYES:
When you rearrange the letters:
THEY SEE

GEORGE BUSH:
When you rearrange the letters:
HE BUGS GORE

THE MORSE CODE :
When you rearrange the letters:
HERE COME DOTS

SLOT MACHINES:
When you rearrange the letters:
CASH LOST IN ME

ANIMOSITY:
When you rearrange the letters:
IS NO AMITY

ELECTION RESULTS:
When you rearrange the letters:
LIES – LETS RECOUNT

SNOOZE ALARMS:
When you rearrange the letters:
ALAS! NO MORE Z S

A DECIMAL POINT:
When you rearrange the letters:
IM A DOT IN PLACE

THE EARTHQUAKES
When you rearrange the letters:
THAT QUEER SHAKE

ELEVEN PLUS TWO:
When you rearrange the letters:
TWELVE PLUS ONE

AND FOR THE GRAND FINALE:

MOTHER-IN-LAW:
When you rearrange the letters:
WOMAN HITLER

அர்த்தசாஸ்திரம், கௌடில்யரால் எழுதப்பட்டது. ஆனாலும் இன்றுள்ள வடிவத்தை அது சில நுற்றாண்டுகள் பின்னால் எய்தியிருக்கலாம் என்பது அறிஞர் கருத்து. ஏறத்தாழ இரண்டாயிரத்து இருநூறு ஆண்டுகளுக்கு முன்பு என்று வைத்துக்கொள்ளலாம். மது அருந்துதல் பற்றி அது சில விஷயங்களைச் சொல்கிறது. எளிதில் இன்று புலப்படாத மதுவகைகள் சிலவற்றைத் தயாரிப்பது பற்றிய சுருக்கமான தயாரிப்பு முறைகளையும் தருகிறது.

அக்காலத்தில் மதுபான வகைகள் பல இருந்தன. அவற்றுள் சில  வருமாறு: மேதகம் – நெல்லால் வடித்த மது; பிரசன்னா – மாவால் சமைத்து வாசனைச் சரக்கிட்டுச் சுவையூட்டப்பட்ட ஒருவகைக் கள்; (பிரசன்னா என்று பெயர் வைப்போர் கவனிக்கவும்!) ஆசவம் – இது விளாம்பழச் சாற்றில் செய்த மது; மைரேயம் – இது சர்க்கரை, ஆடு தின்னாப்பாளை (மேஷஸ்ருங்கம்)ச் செடியின் பட்டை, மிளகு ஆகியவற்றைக் கொண்டு வடித்த ஒரு பானம்; சஹகார சுரா – மாம்பழ மது.

மதுபானம் அரசாங்க உற்பத்திசாலைகளில் மட்டுமே உற்பத்தி செய்யப்பட வேண்டும். அவற்றின் உற்பத்தியை ஒழுங்குற நடத்துவதற்கும் குடி வகைகளின் விற்பனையையும் நுகர்வையும் கட்டுப்படுத்துவதற்கும் மதுபான மேற்பார்வையாளர் என்னும் அதிகாரி நியமிக்கப்படவேண்டும்.

தனிப்பட்டோரின் தயாரிப்பு நிலையங்களையும் மதுக்கடைகளையும் மிகவும் கண்டிப்பாகக் கட்டுப்படுத்த வேண்டும். மதுக்கடைகள் வைத்திருப்போர் தங்கள் நிறுவனங்களைப் போதிய இருக்கைகள் போன்றவற்றுடன் வசதியாக வைத்திருக்க வேண்டும். அவர்கள், மது அருந்த வருவோர் அளவு கடந்து குடிப்பதைத் தடுக்கவேண்டும். மது அருந்துவோர் வெறி மயக்கத்தில் ஏதேனும் நஷ்டத்துக்கு ஆளானால், கடைக்காரர்கள் அவர்களுக்கு நஷ்ட ஈடு தருவதோடு மட்டுமன்றி, அபராதமும் கட்ட வேண்டும்.

மதுக்கடைகள் வைத்திருப்போர் தங்கள் கடைகளை ஒன்றுக்கொன்று அண்மையில் கட்டவிடலாகாது. இதனால் மக்கள் ‘மதுக்கடைகளில் ஊர்தல்’ பெரும்பாலும் தடுக்கப்படும். மதுக்கடைக்கு வெளியில் மக்கள் மது அருந்துவதை முற்றிலும் தடுக்க வேண்டும். (அக்காலத்தில் பள்ளிக்கூடங்கள்,  கோயில்கள் போன்றவற்றின் அருகில் மதுக்கடைகள் கட்டப்படவில்லை போலும்!) மதுக்கடைகளில் குற்றவாளிகள் பெரும்பாலும் கூடுவதுண்டு, எனவே அவற்றை நன்கு கண்காணித்து வருமாறு அரசன் தன்னுடைய ஒற்றர்களுக்கு அறிவுறுத்தவேண்டும்.

அர்த்த சாஸ்திரம் கூறும் கருத்துகளை நோக்கும்போது, மது அருந்துதல் தீமை என்பதையும்,  அதனை முற்றிலும் விலக்குதல் இயலாது என்பதையும், ஆனால் அதைக் கண்டிப்பாகக் கட்டுப்படுத்த வேண்டுமென்பதையும் ஒப்புக்கொள்கிறது எனலாம். (ஆதாரம்-A.L. Basham, The Wonder that was India, 2nd edition, p.217.)